సౌదీకి ట్రంప్ F-35 జెట్‌ల గిఫ్ట్.. ఇజ్రాయెల్ మౌనం వెనక మతలబు ఏంటి?

By Chowdary

Updated : 19 November 2025 11:50 AM

ఇంటర్నెట్‌ డెస్క్‌: పశ్చిమాసియా పవర్‌ బ్యాలెన్స్‌లో కీలక మార్పు రాబోతోంది. ఈ ప్రాంతంలో ఇప్పటి వరకు అమెరికా నుంచి F-35 యుద్ధ విమానాలను (F-35 fighter jets) పొందిన ఏకైక దేశం ఇజ్రాయెల్‌. దీని ద్వారా ఆ దేశం గగనతలంలో తిరుగులేని ఆధిపత్యాన్ని సాధించింది. ఇప్పుడు ఆ పరిస్థితి మారబోతోంది. అమెరికా అధ్యక్షుడు డొనాల్డ్‌ ట్రంప్‌ (Trump).. సౌదీ అరేబియాకు కూడా ఈ జెట్‌లను అమ్మడానికి సిద్ధమయ్యారు. దీంతో ప్రపంచవ్యాప్తంగా ఒక్కసారిగా చర్చ మొదలైంది. ఆశ్చర్యం ఏంటంటే ఇజ్రాయెల్‌ ఈ నిర్ణయాన్ని ఇంతవరకు వ్యతిరేకించలేదు. ఈ వ్యూహాత్మక మౌనం వెనక ఉన్న అంశాలేంటి? ట్రంప్‌ ఎందుకు ఈ నిర్ణయం తీసుకున్నారు?

సౌదీ యువరాజు మహ్మద్‌ బిన్‌ సల్మాన్‌ ఏడేళ్ల తర్వాత అమెరికా పర్యటనకు వెళ్లనున్నారు. అంతకంటే ముందే ట్రంప్‌ ఈ F-35 యుద్ధ విమానాల (F-35 fighter jets) అమ్మకాన్ని ఆమోదిస్తానని ప్రకటించారు. ‘‘నేను ఆ పని చేయాలి అనుకుంటున్నాను. వారు వాటిని కొనాలని కోరుకుంటున్నారు. వారు మా మంచి మిత్రులు’’ అని వైట్‌హౌస్‌లో మీడియాతో అన్నారు. అయితే, స్వయంగా వ్యాపారవేత్త అయిన ట్రంప్‌ ఈ నిర్ణయాన్ని అంత సులభంగా తీసుకోలేదు. ఇరాన్‌ అణుస్థావరాలపై ఈ సంవత్సరం అగ్రరాజ్యం జరిపిన క్షిపణి దాడులకు సౌదీ సహకరించడాన్ని ఈ సందర్భంగా ప్రస్తావించారు. అంటే, ఈ అమ్మకం వెనక ఆర్థిక లావాదేవీలతో పాటు రాజకీయపరమైన కృతజ్ఞత కూడా ఉన్నట్లు స్పష్టమవుతోంది.